عنــدما يتحول النيـو لـوك الى dont even try to look

واحدة ست..
الواحد يتوقع منها ايه يعني..
الست يا اعزائي مهما كانت عاقلة او "هبلة" لازم بييجي عليها وقت تتهبل العاقلة وتعقل الهبلة ..
اما ان تتهبل الهبلة فدي جديدة الصراحة..
لكن بتحصصصصل..
ما شاء الله كل الناس عاملة نيو لوك .. ده حتى حميد الشاعري عمل نيو لوك..لدرجة اعتقد معاها ان هييجي وقت تجديد التأمين الصحي هنلاقيهم مشترطين نسبة السليكون على درجة البرونزاج على كام ملليمتر تحديد نفخ الشفايف ..
جت علينا احنا ومش هنعمل نيو لوك وللا ايه .!!
ولأن الواحد قنوع ومعندوش رغبة انه يحطم نفسيات باقي الستات اللي حواليه من غيرتهم فكان الواحد كافي خيره شره ..
لكن تيجي ازاي دي ..
في عصر الفضائيات والانترنت والمولات التجارية والستات اللي بيتحولوا الى الاحلو لال بطريقة عجيبة جدا..
فكان لابد من وقفة
معاَ نتابع مأساة نيو لوك..


(1) لما متسمعش كلام الاكبر منك
بعد فشل محاولات الاتكنز والشوكلاتنز والحلوياتنز وكلها محاولات ريجيم وعكسه.. ووصول كل الطرق الى طريق مسدود بسبب الدهون والشحوم فكان لابد من تغيير القناة والبحث عن اشياء اخرى..

: حبيبي..عايزة اروح اصبغ شعري
:الحبيب- وقد علت ملامحه ابتسامة لم تصل حتى لاذناه ولكنها اصبحت داير مايدور حوالي راسه-..لون شعرك الطبيعي حلو وعاجبني ..
:لا ده لون جميل اوي هيعجبك والله..
: صمت وابتسامة باين من خلالها شريط سينمائي كده مرير قديم يعود لسبع سنوات عجاف مضت.
: لاااا مش زي ما صبغت قبل كده خااالص.. دي كانت كوافيرة حمير شكلها ومكانتش فاهمة حاجة..-هنيجي للحادثة المشؤمة دي في الاحداث-
لا الكوافيرة دي ممتازة وانا ضمناها..
: مفيش داعي انا بحب شكلك الطبيعي كده
:انا.. عاااااايزة... اصبغ... شعري!!!!
: براحتك..وتبعتها ابتسامة من اياهم ..
وسخونة تم الاتفاق مع الكوافيرة تليفونيا..وتم الحجز وذهبت في المعاد..وقد ازداد وزني وتكعب شكلي بسبب حملي لامنيات النيو لوك وانا اتخيل شكلي اللي هكسر بيه الدنيا وألبس نانسي عجرم بعده اسود..
(2) حد ايده وحشة؟؟

طبعا لم اذهب بمفردي واخذت معي دودج.. وهو الاسم الحركي الجديد لخديجة..بعد ان اقنعتها ان تصبغ شعرها هي الاخرى..دخلنا عند الكوافيرة..واستقبلونا بالترحاب .. ولم لا وسندفع مبلغ لن اقوله لكم خشية على مرارة البعض من التحول والتحور الى رصاص يخترق شاشتي الكمبيوترية ..
وجدت كوافيرة جديدة معاهم عربية الجنسية..
الكوافيرة ستايل ومكان راقي ..
عايزة اصبغ شعري "نـــبيتي"..ووجدت واحدة من الاخريات لها نفس اللون الذي اريده بالظبط فقلت لها see, same color like your"s
تسلمت رأسي الكوافيرة عربية الجنسية وتسلمت رأس خديجة الاثنتان الاخريتان..ولا اعلم لماذا اكتب لاعربية الفصحى والموضوع لا يحتمل كل ذلك الانبعاج..
بادرتني عربية الجنسية قائلة
: اقص لك شعرك كمان؟؟
:لألألألألألألأة .. انا بطول فيه بقالي عشر سنين" فشر هم تلت سنين " ومش عايز يطول ..
:فسارعت بسؤالي وهي تنظر لشعري بنظرة خبير قائلة: حد ايده وحشة قص لك شعرك اخر مرة؟!!..
تفحصت إيدي بتمعن حتى اجد صوبع سادس او مكان بشلة فلم اجد .. فجاوبتها بثقة بعد ا اطمئن قلبي ان ايدي مش وحشة..
: احم انا اللي بقص شعري بنفسي..

ولنا هنا وقفة.. فالكثيرين يعتقدون ان سرعة طول الشعر تتوقف على ايد اللي قاصص الشعر.. في ناس ايدها تقيلة الشعر لا ينمو كويس بعد قصهم وفي ناس العكس الشعر يطول بسرعة بعد قصهم له..وانا لم اكن اعتقد بالمقولة دي بس بعد سؤالها وبعد ما رجعت بالذاكرة كده وافتكرت ان طوال 30 سنة شعري فيهم كان قصير .. يمكن ابتديت اقتنع شوية..
وبأسلوب ساحر كده لقيتها بتقوللي ..مدام ايات .. لازم اقصه ادرجه شوية هيكون اصح واحسن وافضل واخذت تعدد لي مزايا المدرجات..لحد ما قلقت المقص ييجي في العارضة ولسبب الى الان اجهله تماما متكلمتش بحرف وقلتلها ماشي.. وابتدت في جز شعري جزا جزا في مهمة مقدسة للوصول برأسي لمضاهاة المدرجات البابلية.. وانا ساكتة ليه معرفش!!؟؟
واسترقت عدة نظرات لأرى ماذا حل بخديجة بعد ان شهقت ياسمينا بنتي محاولة تنبيهي ان " شكل خديجة يا امي غريييييب اويييي "!!
فلم اتمالك نفسي م الضحك ولولا المقص المضروب في راسي كنت استلقيت على قفايا م الضحك لما لقيت خديجة ناقصها شوية بشاميل وتدخل الفرن بعد ما اصبحت راسها متغطية بورق الفويل"ورق القصدير".. وشكلها فعلا يا سوسو من اغرب ما يكون!!