المحترمين آه ..... الاغبياء لأ !

--------------------------------------------------------------------------------

أولا وقبل كل شيء كلامى موجه للأغبياء و العبط
و ليس لغيرهم !
اما الذين يناقشون باحترام و الحجة بالحجة …. و المنطق بالمنطق …. فهؤلاء بالطبع ليسوا بأغبياء
بل ناس محترمين مؤدبين ....... ما بيشتموش .... مابيتسرعوش !

م الاخر كده و على بلاطة …
المحترمين عارفين نفسهم كويس قوى
و الاغبياء عارفين نفسهم - برضه - كويس قوى

المحترمين اه
الاغبياء لا

واحد يسألنى : مالك بس ؟ متنرفز ليه ؟

انا فعلا متنرفز جدا و فى المعتاد ما اكتبش الا و انا افكارى مرتبة ... لكن المرة دى مش قادر ... حاسس انى حأطق يا عالم ! يا نهار اسود ! لا لا انا ش متنرفز
ده انا قربت اولع ومينفعش ليمون جابر فى الظروف دى !
ده انا حاموت م الغباء اللى انا شايفه ده !
مش ممكن يكون عدد الاغبياء فى امتنا وصل الى هذا الرقم القياسى
يا ربى
ده غباء عالمى ما لوش حل

غباء قياسى ... غباء تاريخى محصلش قبل كده و لا حيحصل زيه بعد كده ان شاء الله !

و حاضرب لكم امثلة من عدة اشياء
( ربما سمعتها فى الماضى اللى فات , سمعت و قرأت و ناقشت على الانترنت و تجمعت معا لاول مرة لتكون القشة التى تقصم ظهر البعير )

المثال الاول :

تابعت مناقشة الاسبوع اللى فات عن عمرو خالد و زيارته للاخوة الاقباط فى مصر و تهنئته لهم
و لكم ان تتصوروا طريقة المناقشة
لاحظوا اننى لا يهمنى نتيجة المناقشة بل طريقتها ( حتى لو انتهت النتيجة بظهور الحق مثلا او تبريء عمرو خالد من تهمة غريبة )
ولاحظت الفاظ ذكرت فى الحوار من نوعية
الضال المضل ( ده اللى هو عمرو خالد مش عمرو دياب واخدين بالكم ؟ )
الفاسق الزنديق ( اه و الله ) الكافر ( يا نهار اسود )
حاجة تغيظ مش كده ؟
وتذكرت - و الذكرى تجر الذكرى - نقاش شبيها حدث عندما رحل عمرو خالد الى لندن
وعندما بدأ صناع الحياة
وعندما اخذ تصنيف التايم الامريكية
و غير ذلك كثير

نفس الغباء
نفس الهبل
اتهامات بلا دليل ... حكم على النوايا ... احتكار الحقيقة و عندما يرد البعض يقولون بمنتهى العنجهية ( وهل هو فوق النقد ؟ )
وعندما تذكرهم بكل ادب انه ليس فوق النقد و لكنه بالتأكيد فوق الشتيمة !
لا تجد مسمعا
لقد اسمعت لو ناديت حيا
ولكن لا حياة لمن تنادى

يعنى مسار النقاش كان تقريبا كده :
الله علي عمرو خالد !
ده ضال مضل افسد شبابنا و سحر نسائنا و سفه احلامنا ! منه لله !
يا راجل حرام عليك ! اتق الله ! ده مؤمن وتقى نحسبه كذلك ولا نزكى على الله احدا !
ده كذا وكذا و كذا !
يا راجل حرام عليك ! ده صحى الناس ده عمل نشر للدعوة ده فيه دلوقت تلات اربع دعاة من تلاميذه زى مصطفى حسنى و معز مسعود وغيره ...
ده هو و امثاله كذا وكذا ... انت مقريتش فتوى الشيخ ( شخبوط الفلانى ) فى السعودية حول انه ضال ومضل !!!!!!!

يا عم الحاج دول مختلفين عننا بس برضه مبيكفروش زى ما انت بتقول ومبيشتموش
ثم الشيخ بيفتى على حسب السؤال ... لو سألته (ما حكم من يقول كذا وكذا ؟ ) حيقول لك : حكمه كذا و الله اعلم

انت بتدافع عن عمرو خالد علشان انت من مجاذيبه ومحبيه

لا حول و لا قوة الا بالله ... انا بتكلم بالمنطق معاك اهوه شايفنى ضربتك مثلا !
اهو انتوا كده دايما .... خلاص يعنى ... اعتبرتوه معصوم م الخطأ

( فى ذهول ) هو فين الخطأ ده اساسا ... انت بتشتم م الصبح و الواحد ساكت لك ... ثم انت مين اساسا عشان تقعد تقيم فى الناس .... روح اعمل احسن منه ... العلماء يتكلموا مع العلماء وينتقدوا الدعاة .... انت بقى ايه اللى يخليك تتكلم اساسا ... انت مين ؟ ايه مدى اللى قريته فى الدين ؟ هو انت قريتلك كتابين وحديثين بقيت تنصب نفسك مفتى تقول ده صح و ده غلط ؟
و لا عشان الشيخ الفلانى اللى انته من مجاذيبه قال ان فلان ده غلط تقوم انت تقول وراه ومن غير تفكير و لا سؤال :
سمعا و طاعة ! شي حا يا باشا ! مين اللى من مجاذيب مين ؟

( فى حنق لوذعى ) : انته بتخوض فى لحوم العلماء يا كافر يا بن الكافر يابن الكلب ! طب خد فى سنانك ! وكمان بتشتمنى طب خد فى عينك ! وكمان ماشى حافى ؟ طب خد دى فى كتفك !
:b udo:

هنا يتدخل باقى الاعضاء للتهدئة و للتحجيز فى الخناقة وتتوالى تعليقاتهم محاولة التهدئة وسط الخناقة حامية الوطيس :

( بوم طاخ اى ) ( صلوا ع النبى يا جماعة )
( سيبونى انا هشرب من دمه و الله لاوريلك يازنديق يا منافق )
( لاحول و لا قوة الا بالله ... يا جماعة عيب ده انتوا اخوة و الضفر ميطلعش من اللحم و الدم عمره ما يبقى مية والمصارين فىالبطن بتتخانق و ..... )
( ما حدش يمسكنى ... هو اللى جابوا لنفسه )

( حد يجيب الاسعاااااااااااااف ) ( يا بوليس يا بوليس !!! )
( بوليس ايه ؟ يا مطافى ! وا وى وا وى وا وى ! )


ده طبعا فى منتدى .... وانا مستعد اورد المثال و اسم المنتدى و المناقشة ( اللى هى قريبة لكده ) لو حد طلب
وانت كنت ما اعتقدش حد محتاج
لأننا كلنا بنتكعبل فى الحاجات دى و احنا ماشيين غصب عننا

ما علينا خش ع المثال التانى


المثال التانى :
مثال رياضى علشان تخفيف حدة القراءة على اعصابك !

( المثال عن مناقشات حقيقية شبيهة حدثت فى عدة منتديات رياضية )
كأس الامم بدأت و لاحظت نقاش حول حسن شحاتة

و كان احد مواضيع النقاشات التى اضحكتنى بمرارة نقاش حول ان حسن شحاتة مدرب بالبركة
طيب ماشى ما علينا
تلاقى مسار النقاش برضه بنفس الطريقة :
مدرب بالبركة ؟ ده انته اللى بركه يا بركه ده كفاية جاب لنا كاس الامم
كاس الامم دى يا روح ماما تاخدها وتبلها و تشرب ميتها ... دى كسبناها علشان على ارضنا
يا سلام .... طب ما كذا مرة اتعملت على ارضنا ايه اللى فرق يعنى ؟ قال مدرب بركة قال ..... ياريت كل المدربين بتوعنا يكونوا مدربين بالبركة زيه
يا حبيبى هو بيكسب علشان لعيبة الاهلى
يا اخى مش مهم اللى لينا النتيجة
انا بقولك اهو مدرب فاشل
صدقنى انت حمار ومتفهمش فى الكورة !
انا حمار يا متخلف يا جاهل يا بن كذا !
بس يا بتاع شوبير !! انته و الحرامية اللى باعتينك
اخرص يا زملكاوى يا متعفن !

:b udo:
هنا يتدخل باقى الاعضاء للتهدئة و للتحجيز فى الخناقة وتتوالى تعليقاتهم محاولة التهدئة وسط الخناقة حامية الوطيس :
( بوم طاخ اى ) ( صلوا ع النبى يا جماعة )
( يا اخى الله يخرب بيتك على بيته على بيت الزمالك على بيت الاهلى على بيتى انا شخصيا فى يوم واحد !!!!!! )
( سيبونى انا هشرب من دمه
و الله لاوريلك ياعبيط يا اهبل )
( الحق يا حكم ..... اجرى يا حكم ! )
( ما حدش يمسكنى ... هو اللى جابوا لنفسه )
( حد يجيب الاسعاااااااااااااف )
( فين الفيفا ؟!!! آى !
فين اتحاد الكورة ؟ آى !
فين المستشفى ؟ آى ! )
( يا بوليس )
( بوليس ايه انته كمان ؟ يا مطافى ! وا وى وا وى وا وى ! )


ملاحظين درجة الغباء فى النقاش العالية اكيد ..... !
غباء خمسة ريختر ! زى ما قلت لكم غباء عالمى !


ما علينا خش ع المثال الزفت التالت !

المثال التالت :
( واقعة حقيقية و نقاش حدث فعلا فى عدة منتديات بدون ذكر اسماء )
كان موضوع النقاش حول حسن نصر الله وتصريحاته الاخيرة المهددة لاسرائيل

و كان النقاش شبيها بالتالى تعليقا على الخبر فى احد المناقشات
= و الله راجل جدع نصر الله عرف يوريلهم العين الحمرا
يا عم ده راجل شيعى و كافر .... !
= ( فى استغراب ) ايه الهبل ده ؟ وايه دخل ده بده ؟ ثم لنفرض انه شيعى و لا كافر حتى على الاقل بيعمل مواقف تستاهل الاحترام يكفى انه بيأذى عدوك اللى هيا اسرائيل
يا عم هو بيعمل حاجة دى جعجعة فاضية ... ده جبان !!! يعنى هيضرب تل ابيب بالنووى ؟ يا اخويا بلا خيبة !
= يا اخى جتك انت ستين نيلة
ما تحترم نفسك يا جدع انت ! الله !
= انا برضه اللى احترم نفسى ؟

** هنا يدخل فى النقاش ( واحد غبى تالت )
يا جماعة مفيش داعى للاختلاف خلونا ندعى اللهم اهلك الظالمين بالظالمين واخرجنا من بينهم سالمين !!!!!!!!!

= ( فى ذهول وغيظ ) ظالمين ايه انت كمان ؟ انتوا بتساووا ما بين اليهود و نصر الله ؟
اسكت اسكت ! ايش فهمك انت انته و لاعارف حاجة ده انت نايم فى العسل !!!
= و الله ؟
ايوة ايوة انت متعرفش ان اسرائيل عملت حزب الله وحماس كده وكده !
= لا ياشيخ ؟!!!!!!!!!!
( بلهجة العالم ببواطن الأمور ) : ايوة ايوة ! و اللى عمل حماس واحد يهودى ساكن فى تل ابيب اسمه شمعون شمعون ! اما حزب الله فاسرائيل عملته عشان تمثيلية كده وكده يعنى !!!!
= شوف ازاااااااااى !!!!!!!!!!!!!!!!
( مؤكدا بيقين وغباء منقطع النظير ) ايوة ايوة !!!! مش قلت لك انك نايم فى العسل
= ممكن اسئلك سؤال بس متزعلش منى معلهش يعنى
لا اسئل مفيش زعل
= هو سؤال واحد بس ... على رأى محمد صبحى : انته حمار يا حمارى ؟
( فى غضب هادر وذهول ) ايه ؟
= ( فى غضب مماثل ) ما هو لما واحد يقول الكلام اللى بتقوله ده يبقى اكيد حمار !! يا جماعة احنا معانا حمار فى المنتدى !!!
شى حااااااا !! فين الديل يااااااااااض ؟!! طلع الديل ياااااااض !!!
( فى غيظ هائل ) انا اللى حمار يا صهيونى يا بن كذا ف كذا
= سيبونى عليه !
:b udo:
هنا يتدخل باقى الاعضاء للتهدئة و للتحجيز فى الخناقة وتتوالى تعليقاتهم محاولة التهدئة وسط الخناقة حامية الوطيس :


( بوم طاخ اى ) ( صلوا ع النبى يا جماعة )
( سيبونى انا هشرب من دمه و الله لاوريلك يازنديق يا منافق )
( لاحول و لا قوة الا بالله ... يا جماعة عيب ده انتوا اخوة و الضفر ميطلعش من اللحم و الدم عمره ما يبقى مية والمصارين فىالبطن بتتخانق و ..... )
( ما حدش يمسكنى ... هو اللى جابوا لنفسه )

( حد يجيب الاسعاااااااااااااف )
( حد يجيب الامم المتحدة !!!!! طب جامعة الدول حتى !!!! طب المهندسين يا اسطى ؟ !!!!!! )
( يا بوليس يا بوليس !!! )
( بوليس ايه ؟ يا مطافى ! وا وى وا وى وا وى ! )



كفاية كده ! اظن طاقة الدم المحروق اتنقلت لكم !
يعنى انا اظن ان فى الغالب كل من سيقرأ الموضوع حيحس بنفس حرقة الدم وارتفاع الضغط الرهيب نفسه و احتمال يجيليه السكر وربنا يستر ما تكرفش على شلل اطفال و اوووع و عااااااا وكده !

بالفعل لو ده حصل فانا بكده حستريح نفسيا .... ع الاقل احس ان مش لوحدى فى القرف ده !

مش ملاحظين حاجة مشتركة بين الحوارات اللى فاتت ؟
تحطيم الامثلة الجيدة
فعمرو خالد الداعية النشيط و الذى ينتقل من مكان الى مكان لنشر دعوة الله بمنتهى الاخلاص نحسبه كذلك ولانزكى على الله احد
بكل بساطة يصبح ضالا مضلا !
و حسن شحاتة المدرب العبقرى و العظيم ...الأسد المصرى .... يجعلونه بمنتهى البساطة جنرالات المقاهى... مدربا اى كلام !! - هكذا -
و نصر الله يصبح كافرا ثم جبانا ثم عميلا للموساد
و بالمثل يصبح الباقون بنفس الطريقة
فيجعلون اسماعيل هنية عميلا لايران وسوريا
واحمد زويل عالم اميركى هرب من مصر ( اه والله فى ناس ربنا يشفيها بتقول كده : صنع فى مصر بس متجمع فى امريكا ... شوفت قلة الادب و قلة التربية ؟ )


وهكذا وهكذا قس على ذلك فى كل ما تتخيله مما سبق ومما سيستجد !

الغريب انك تجد من يهاجمون عمرو خالد كثيرون و لا اجد ربع هذه المقالات الموجه ضد عمرو خالد .... ربعها فقط موجها لمهاجمة حملات التبشير فى اوروبا و اسيا وافريقيا بل و مصر !
يهاجمون عمرو خالد فى 20 الف مقالة و لا اجد غير 20 مقالة عن القس الرائع الخلوق زكريا بطرس و ترهاته !

و لغريب انك تجدهم يهاجمون احمد زويل لسفره من مصر - كذا ! - ولا اجد من يهاجم المسئول عن ذلك او من يهاجم المسئول عن عدم اقامة مشروع جامعة احمد زويل فى مصر وليس فى قطر
او من يتحدث عن ايقاف مشروع د. فاروق الباز التخطيطى فى مصر مثلا

والغريب ايضا انهم يهاجمون حسن شحاتة .... و لا احد يهاجم احمد شوبير او يتحدث عن الصفقات التى تثير الشبهات و يجريها فى اتحاد الكرة ! او سمير زاهر و سبوباته ! او حسن حمدى وفساده ! او ممدوح عباس وتهليبه !

والغريب انهم يهاجمون اسماعيل هنية ... ويتهمونه باشياء بلا دليل .... ويتركون اناسا جلسوا مع الاسرائيلي وتفاوضوا مع الاسرائيلى و شربوا كئوس خمر ونخب الصحة والسلام مع الاسرائيلى .... لا احد يتحدث ببساطة .... لا احد يتحدث عن دحلان و اسافينه بين فتح وحماس و لا عن جبريل الرجوب و خيانته و لا عمن سلم مروان البرغوثى الى الاسرائيليين بلا طلقة سلاح !
لا احد يتحدث !

ثم يهاجمون حسن نصر الله و يدعون انه عميلا للموساد ..... طيب لا داعى للحديث عن الاخوة فى لبنان الباريسيون احباب شيراك و رايس ؟ لا داعى !


يهاجمون النماذج التى تجد شعبية
يحطمون شعبيتها
يشوهون صورتها
ثم

تختفى هذه النماذج و لا تتكرر لانها لن يحتذى احد بمقاوم ( عميل و شيعى وكافر ! ) و لن يقلد شاب ( عالم امريكى هارب وخائن ! ) ولن يصبح شاب داعية مثل ( داعية ضال ومضل )
الخ الخ الخ ... برابيب براباب برابووب !

انهم يحطمون الرموز التى قد تصلح للاسترشاد
وبعد ان يفرغون من هذه الرموز
يستديرون الى النماذج الاثقل

الى الائمة
( فنجد جمال البنا - صاحب فتوى تدخين السجائر فى نهار رمضان - نجده يدعو لرمى مذاهب الائمة الاربعة جانبا !!!!!!!! )

الى الصحابة
( فنجد غمزا و لمزا فى الصحابة من كاتب هنا او صحفى هناك
فنجد حسان بن ثابت من يتهمه بالجبن
و عمر بن عبد العزيز من يتهمه بانه لم يكن حاكم جيدا - هكذا ؟ -
و عمرو بن العاص يصبح خائنا وخالد بن الوليد يريد قلب نظام الحكم على عمر بن الخطاب ! رضى الله عنهم اجمعين ! )


ثم نصل الى النبى

( فنجد رسوما فى دولة تسمى الدانمرك و عندما نعترض يقولون فى براءة : اوه انها حرية تعبير
ثم رسوم فى السويد ثم اساءات فى فرنسا
ثم اخيرا وليس اخرا فيلما سيخرجونه عن النبى فى هولندا ... و رئيس وزراء هولندا يدعوا لضبط النفس )

ثم الى التشكيك فى العقيدة

وبصراحة اذا نجحوا فى التشكيك فى النماذج الصالحة والشريفة ثم السلف الصالح ثم الائمة ثم التابعين ثم الصحابة ثم النبى
اذا نجحوا فى ذلك كله فلن يتبقى عقيدة من اصله !

ثم بعد التشكيك فى العقيدة يشككوا فى السنة وانها نقلت بدقة - هكذا - و التشكيك فى البخار ى والمسلم - هكذا ؟ -

ثم بعد فترة لم لا يشككون فى القرءان وتواتره و انه ليس كتاب الله كما انزل


ثم بعد ذلك لم لا يشككون فى وجود الله ذاته و ان الطبيعة هى التى خلقتنا و القوى الطبيعية و ليس الله ؟


السلسلة تجر السلسلة
و الحبل يجر الحبل


اه منكم يا اغبياء امتنا ! اه منكم ومن تخلفكم وغبائكم الذى لا يرجى له شفاء ! اوف !

و احلى ملحوظة سمعتها بقى : يقولك الناس فى المنتديات دول عملا لاسرائيل علشان تدمير الامة الاسلامية !

يا حبيبى !!!!!!!!
ومنين اسرائيل تجيب فلوس تدفع لكل هؤلاء الكرام الاغبياء ؟
هتدفع لمين ولا لمين و لا لمين ؟
ثم هى مش محتاجة عملاء
فى ناس عندنا بتخدم اسرائيل من غير ما بيعرفوا انهم بيخدموهم

اغبياء بقى تقول ايه

صحيح والله قول الشاعر العربى القديم :
كل مرض و له دوا .... اى والله
الا الغباء ما تلاقيلوش .... اى والله

حاجة زى كده !


* و ارجع واقول الكلام تانى اللى قلته فى اول الكلام :


فعلا !
مش ممكن يكون عدد الاغبياء فى امتنا وصل الى هذا الرقم القياسى
يا ربى
ده غباء عالمى ما لوش حل

غباء قياسى ... غباء تاريخى محصلش قبل كده و لا حيحصل زيه بعد كده ان شاء الله !




وختاما و بعد كل شيء :
كلامى موجه للأغبياء و العبط
و ليس لغيرهم !
اما الذين يناقشون باحترام و الحجة بالحجة …. و المنطق بالمنطق …. فهؤلاء بالطبع ليسوا بأغبياء
بل ناس محترمين مؤدبين ....... ما بيشتموش( واخدين بالكم ) .... و شاطرين .... مابيتسرعوش !

و م الاخر كده و على بلاطة …
المحترمين عارفين نفسهم كويس قوى
و الاغبياء عارفين نفسهم - برضه - كويس قوى

و الرحمة من عندك يا رب .....
وفى امان الله