الحلقه *14* يوميــــات اتنين مخطوبين

من طرف **muslema_99** 2007-09-05, 12:03 am

-السلام عليكم..عمر...ازيك عامل ايه

-أهلا يا سارة ازيك..اخبارك ايه..ايه يا بنتي فينك اليوم كله..

-موجوده دايخه السبع دوخات علي الفستان..تعبت بجد ياعمر..

-ليه يا بنتي انا مش عارف انتي تاعبة نفسك ليه ..أي فستان والسلام..دول هما كام ساعه يا سارة.

-دورت يا عمر مالاقيتش...عمر ... بقولك ايه ..انا بفكر افصل فستان..

-ماشي يا سارة اللي تشوفيه..ولو اني ..-

طيب هاتديني كام طيب للفستان..

-سارة انا امكانياتي ما تسمحش..بصي هما 1000 جنيه

-طيب بحبها شوية طيب..خليهم 1200

-طيب يا ست سارة لما نشوف أخرتها..

-ربنا يخليك ليا يارب يا رافع من معنوياتي..

-ويخليكي ليا يارب يا ساسووو...

خلصت مكالمتي مع عمر وكنت في منتهي السعاده .. ياااااااااااه الحمدلله

انا مش عارف الاقيها منين ولا منين..حتي سارة مش حاسه بيا وكل همها الفستان يبقي ازاي ..طيب وانا اجيب منين لده

كله ..ومش معقول كل شوية اقول لبابا هات هات..الواحد يخلي عنده دم شوية..

وبعدين في البنات دول...

عمر

الحمدلله اتوفقت في القماش والموديل اللي هاعمله الحمدلله..بس جيت احاسب..لاقيته بيقولي 1250..ياخبر ابيض..طيب

اعمل ايه دلوقتي..فدفعتله الفلوس..واخدت القماش وروحت للاتيليه..طبعا بهدلتني ويوميا بروح اقعدلها بعد الشغل..بس

المشكله ان كده الموضوع هايزيد عن المبلغ اللي حددهولي عمر ؟؟؟

الحمدلله الفستان خلص وحمايا العزيز راح استلمه..وجابهولي وطبعا عمر ما شافهووووووووش...الله ده يجنن ما شاء

الله..قست الفستان كان جميل جداااااااا ..

مر اسبوع ولاقيت عمر بيتصل ..

-السلام عليكم

-وعليكم السلام..سارة ..انتي مادفعتيش الفلوس للاتيليه؟؟؟

-لأ يا عمر هادفعه منين

-يعني ايه تدفعيه منين..ما انا اديتك الفلوس

-طيب يا عمر اهدي طيب مالك..انا الفلوس يادوب كفت تمن القماش

-انتي بتهرجي يا سارة ..مش احنا اتفقنا علي مبلغ معين..

-اعمل ايه طيب ده اللي حصل ..

-يرضيكي كده يبقي منظري كده والراجل جاي يرمي كلامي عليا انه مذنوق ...وطبعا هو عايز فلوسه وانا زاي الاهبل ما

اعرفش أي حاجه

-ليه هو مش باباك دفعلهم..

-لأ طبعا كفاية اوي الي دفعهولي بابا..

-كل ده عشان تمن التفصيل ...خسارة فيا يعني..

-سارة..اعملي في حسابك انا مش هاحط قرش تاني في فلوس الفستان..وده اخر كلام عندي..

-ياعمر..ارجوك اهدي واسمعني

-سلام ياسارة

- عمر ...ياعمر...